ഇരിങ്ങാലക്കുട സെന്റ്ജോസഫ്സ് കോളേജിൽ ഓണപ്പാച്ചിൽ ഇക്കുറി നേരത്തെയാണ്. കലാലയത്തിന്റെ അറുപതാം വയസിൽ അറുപതു പരിപാടികളുമായാണ് ഇത്തവണ ഓണപ്പൂരം. ഓണം ഇൻസ്റ്റന്റായെന്നുള്ള വേവലാതികളില്ലാതെ ക്യാംപസിലെല്ലായിടത്തും ഓണചർച്ചകൾ ചൂടുപിടിക്കുന്നു. നാട്ടുപൂക്കളുടെ പ്രദർശനമൊരുക്കി സംഘടിപ്പിച്ച പൂവുകൾക്കൊരു പുണ്യകാലമെന്ന പരിപാടിയോടെ കോളേജിലെ ഓണാഘോഷപരിപാടികൾക്ക് ഔദ്യോഗികമായി തുടക്കം കുറിച്ചു ഉടനേ തന്നെ മറ്റു കലാപരിപാടികളും രംഗത്തെത്തി.
ഓഗസ്റ്റ് 23, 24 ദിവങ്ങളിലായി രണ്ടു ദിവസത്തെ ഓണാഘോഷപരിപാടികളാണ് കോളേജ് സംഘടിപ്പിച്ചത്. കോളേജിന്റ ആഘോഷചരിത്രത്തെ തന്നെ തിരുത്തി കുറിക്കുന്ന നിരവധി കലാകായിക പരിപാടികൾക്ക് ഇത്തവണ സെന്റ്.ജോസഫ്സ് കോളേജ് സാക്ഷ്യം വഹിച്ചു. ഓണാഘോഷ സമാപനത്തിന്റെ ഭാഗമായി 24 ന് ഒരുക്കിയ മെഗാതിരുവാതിരയായിരുന്നു മുഖ്യ ആകർഷണം. മെഗാതിരുവാതിര യോടനുബന്ധിച്ച പരിപാടികളിൽ ബഹുമാനപ്പെട്ട തൃശ്ശൂർ കളക്ടർ വി.ആർ.കൃഷ്ണതേജ ഐ.എ.എസ്, ഡപ്യൂട്ടി കളക്ടർ എന്നിവർ പങ്കെടുത്തു.
മുറ്റത്തൊരു പൊന്നോണം എന്ന ഹാഷ്ടാഗിൽ വിവിധ പഠനവിഭാഗങ്ങളിൽ നിന്നും അമ്പതോളം കലാപരിപാടികളാണ് ഒരുക്കിയത്. വടംവലി, പൂക്കള മത്സരം, പൂവില്ലാപൂക്കളം, ചാക്കിലോട്ടം, ഓണക്കളികൾ, നിധിവേട്ട, ഓണം റീൽസ്, ഓണപ്പാട്ട്, അടിയോടടി ഓണരുചികൾ, മലയാളിമങ്ക, മാവേലിക്കൊരു കത്ത്, ഓണപ്പോരാട്ടം തുടങ്ങിയ വൈവിധ്യമാർന്ന കലാകായിക പരിപാടികളുമായി സെന്റ് ജോസഫ്സ് ഓണം കളറായി
www.TheCampusLifeOnlne.com
